اداکار عدنان صدیقی کی شاہ برطانیہ چارلس سے ملاقات، تصاویر وائرل

کراچی: پاکستان کے سینئر اداکار عدنان صدیقی کی برطانوی شاہ چارلس سوم سے ملاقات، جس کی تصاویر انہوں نے اپنے سوشل میڈیا اکائونٹ پر شیئر کی ہیں۔
بکنگھم پیلس میں ہونے والی اس مختصر مگر یادگار ملاقات کا احوال انہوں نے سوشل میڈیا پر اپنے مداحوں کے ساتھ شیئر کیا اور مداحوں کو کنگ چارلس کے بارے میں اپنے خیالات سے آگاہ کیا۔
انسٹاگرام پر شیئر کی گئی تصاویر میں عدنان صدیقی اور شاہ چارلس سوم کو خوش گوار موڈ میں گفتگو کرتے ہوئے دیکھا جاسکتا ہے۔ عدنان نے کیپشن میں لکھا کہ یہ گفتگو مختصر مگر پُرجوش تھی، جیسے پلک جھپکتے ہی دو مختلف دنیا ایک دوسرے سے مل رہی ہوں۔
عدنان صدیقی کا کہنا تھا کہ شاہ چارلس سوم میں لوگوں کو پُرسکون کرنے کی خاص صلاحیت تھی، جو ان کے ذہن پر دیرپا اثر چھوڑ گئی۔ انہوں نے انسٹا اسٹوری میں بکنگھم پیلس کی تقریب کا دعوت نامہ بھی شیئر کیا۔
یہ تقریب 13 نومبر 2024 کو شاہ برطانیہ اور ملکہ کی جانب سے فلم اور ٹیلی وژن انڈسٹری میں نمایاں خدمات انجام دینے والی شخصیات کے اعزاز میں منعقد کی گئی تھی، جس میں عدنان صدیقی کو بھی مدعو کیا گیا تھا۔
خیال رہے کہ اداکار عدنان صدیقی پاکستان کے مایہ ناز فنکاروں میں سے ہیں۔ 1994ء میں پی ٹی وی کے ڈرامہ عروسہ سے اداکاری کا آغاز کیا، وہ لولی وُڈ، بولی وُڈ اور ہالی وُڈ میں بھی اپنی صلاحیتوں کے جوہر دکھائے ہیں۔