کراچی: امریکا کی 20 سے زائد ممتاز جامعات کے نمائندگان کراچی پہنچے، جو ایجوکیشن یو ایس اے کے اشتراک سے اپنے سالانہ ساؤتھ ایشیا اسپرنگ ٹور کے تحت پاکستان کا دورہ کررہے ہیں۔ اس سلسلے میں ایجوکیشن یو ایس اے نے کراچی کے ایک مقامی ہوٹل میں شاندار تعلیمی میلے کا انعقاد کیا، جہاں سیکڑوں پاکستانی طلبہ و طالبات نے شرکت کی اور امریکا میں اعلیٰ تعلیم کے مواقع، وظائف، داخلے کے طریقہ کار اور دیگر اہم امور پر مفید اور مفت معلومات حاصل کیں۔
کراچی میں منعقدہ یہ تعلیمی میلہ اس دورے کا پہلا مرحلہ تھا، جس کے بعد لاہور اور اسلام آباد میں بھی اسی نوعیت کی تقریبات منعقد کی جائیں گی۔ امریکی جامعات کے نمائندگان نے پاکستانی طلبہ کے لیے امریکا میں تعلیمی امکانات، کیمپس کی زندگی، مالی معاونت اور داخلے کے مختلف پہلوؤں پر تفصیلی بریفنگ دی، تاکہ انہیں وہاں تعلیم حاصل کرنے کے امکانات کو بہتر طریقے سے سمجھنے میں مدد مل سکے۔
اس موقع پر کراچی میں تعینات امریکی قونصل جنرل اسکاٹ اربام نے کہا، اس وقت قریباً 11 ہزار پاکستانی طلبہ امریکا میں اعلیٰ تعلیم حاصل کررہے ہیں۔ امریکی حکومت کو فخر ہے کہ وہ جنوبی ایشیا کالج ٹور کی مدد سے امریکا میں اعلیٰ تعلیم حاصل کرنے کے خواہش مند پاکستانی طلبہ کو ان کے گھر کی دہلیز تک مفت وسہل تعلیمی معلومات باہم پہنچانے میں مدد فراہم کررہی ہے، جس کا آغاز کراچی سے کیا گیا ہے، تاکہ پاکستانی طلبہ کو عالمی معیار کی تعلیمی سہولتوں سے جوڑا جاسکے۔
انسٹی ٹیوٹ آف انٹرنیشنل ایجوکیشن (آئی آئی ای) کی اوپن ڈورز رپورٹ 2024 کے مطابق، اس وقت امریکا کی جامعات میں پاکستانی طلبہ کے اندراج کی شرح تاریخ کی بلند ترین سطح پر پہنچ چکی ہے۔ ہزاروں اعلیٰ تعلیمی پروگرام، عالمی معیار کے اساتذہ اور بے مثال تعلیمی لچک کے ساتھ، امریکا بین الاقوامی طلبہ کے لیے سب سے پسندیدہ تعلیمی منزل بنا ہوا ہے۔
امریکی سفارتی مشن پاکستان میں اعلیٰ تعلیم کے فروغ میں کلیدی کردار ادا کررہا ہے، اور سالانہ منعقد ہونے والا یہ ساؤتھ ایشیا کالج ٹور بھی اسی سلسلے کی ایک کڑی ہے۔ اس دورے کے تحت امریکی جامعات کے نمائندے پاکستان آکر طلبہ سے براہِ راست ملاقات کرتے ہیں۔ کراچی سے آغاز کے بعد یہ ٹور لاہور اور اسلام آباد میں بھی منعقد ہوگا۔ اس کا اہتمام یونائیٹڈ اسٹیٹس ایجوکیشنل فاؤنڈیشن ان پاکستان (یو ایس ای ایف پی) کررہا ہے، جو پاکستان اور امریکا کے درمیان 1950 میں قائم ہونے والا ایک دوطرفہ تعلیمی تبادلہ پروگرام ہے۔
ایجوکیشن یو ایس اے – پاکستان، جو امریکی محکمہ خارجہ کے گلوبل ایڈوائزنگ نیٹ ورک کا حصہ ہے، امریکا میں اعلیٰ تعلیم سے متعلق معلومات کا واحد مستند اور مفت ذریعہ ہے۔ امریکی جامعات سے فارغ التحصیل ماہرین پر مشتمل ایجوکیشن یو ایس اے کی ٹیم پاکستانی طلبہ کو امریکا میں اعلیٰ تعلیم کے حصول کے لیے مکمل رہنمائی فراہم کرتی ہے۔
ایجوکیشن یو ایس اے کی مفت تعلیمی مشاورت حاصل کرنے کے لیے مزید معلومات اس ویب سائٹ پر معلومات دستیاب ہیں www.usefpakistan.org۔