رواں سال کے اختتام تک شادی کرکے نقد انعام پانے کی انوکھی اسکیم

بیجنگ: چین میں تیزی سے کم ہوتی شادیوں کی شرح پر قابو پانے کے لیے حکومت پھر سے متحرک ہوگئی۔
غیر ملکی میڈیا کے مطابق چین کے مشرقی شہر نِنگبو میں شادی کرنے والے جوڑوں کے لیے خصوصی انعام کا اعلان کیا گیا ہے۔
رپورٹ میں بتایا گیا کہ ایسے جوڑے جو 28 اکتوبر سے 31 دسمبر کے درمیان شادی رجسٹرڈ کرائیں گے، انہیں شادی کے خرچ کے کیش واؤچرز دیے جائیں گے جس کا مقصد نوجوانوں کو شادی اور بچے پیدا کرنے کی طرف دوبارہ مائل کرنا ہے۔
رپورٹ کے مطابق گزشتہ سال چین میں شادیوں کی تعداد 20 فیصد کم ہوئی، جو اب تک کی سب سے بڑی سالانہ کمی ہے۔
شادی اور خاندان شروع کرنے میں کم دلچسپی کی وجہ بچوں کی پرورش اور تعلیم کے بڑھتے اخراجات کو قرار دیا جاتا ہے۔
تاہم نِنگبو کے سول افیئرز ڈپارٹمنٹ نے اپنی آفیشل وی چیٹ پوسٹ میں بتایا کہ نئے شادی شدہ جوڑے ایک ہزار یوآن(تقریباً 40 ہزار پاکستان روپے) مالیت کے واؤچرز حاصل کر سکتے ہیں۔
بیان میں کہا گیا کہ کیش واؤچرز محدود تعداد میں ہیں اس لیے پہلے آئیے، پہلے پائیے کی بنیاد پر جاری کیے جائیں گے۔
رپورٹ کے مطابق ایسے ہی اقدامات مشرقی شہروں (Hangzhou) اور (Pinghu) میں بھی کیے جا رہے ہیں، جہاں سال کے آخر تک کیش واؤچرز دیے جائیں گے۔
خیال رہے کہ چینی حکام کے لیے شادی اور بچوں کی پیدائش میں دلچسپی بڑھانا ایک اہم مسئلہ بن چکا، کیوں کہ چین کی آبادی 1.4 ارب ہے مگر بہت تیزی سے بوڑھی ہورہی ہے۔