کراچی: کھلے مین ہول میں بچی کے گرنے کا ایک اور واقعہ سامنے آگیا۔
شہر قائد میں منگھوپیر تھانے کے علاقے گرم چشمہ یونین کمیٹی نمبر2 میں نجی اسکول کی پہلی جماعت کی طالبہ اچانک کھلے مین ہول میں گرگئی، جائے وقوعہ سے گزرنے والے ایک شہری نے بچی کو بروقت کھلے مین ہول سے نکال کر بچالیا۔ بچی کی شناخت عنایہ امین کے نام سے کی گئی۔
کھلا مین ہول 4 سے 5 فٹ گہرا تھا تاہم کھلے مین ہول میں پانی کا بہاؤ انتہائی کم تھا، ذرائع کے مطابق بچی چھٹی کے بعد دیگر بچیوں کے ہمراہ اسکول سے گھر جارہی تھی کہ نجی اسکول کے باہر ہی کھلے مین ہول میں گرگئی۔
واقعے کے فوری بعد بچی کے والدین نجی اسکول پہنچ گئے، حادثے کی اطلاع ملنے پر پولیس بھی موقع پر پہنچ گئی، ایس ایچ او منگھوپیر زبیر نواز نے بتایا کہ منگھوپیر میں متعدد گٹروں کے ڈھکن کھلے پڑے ہیں، اسکول کی بچی جیسے ہی کھلے مین ہول میں سلپ ہوئی، موقع پر موجود شہری نے اسے بچایا۔
واقعے کے بعد ٹاؤن چیئرمین نواز بروہی کو بھی موقع پر طلب کیا گیا، ٹاؤن چیئرمین کا کہنا ہے، انہوں نے گٹر کے ڈھکن یوسی چیئرمین کو دے دیے تھے، انہوں نے لگائے کیوں نہیں، معلوم کیا جارہا ہے۔