روم: 56 سالہ سابق نرس پر مبینہ طور پر آنجہانی والدہ کا روپ دھار کر پنشن بٹورنے کے الزام میں تحقیقات شروع کردی گئی۔
اٹلی کے مقامی میڈیا کے مطابق شہری پر الزام عائد کیا گیا ہے کہ وہ وِگ، لپ اسٹک اور زیورات کا استعمال کرکے اپنی مُردہ ماں کا روپ بدل کر دھوکے سے ان کی پنشن بٹور رہا تھا۔
رپورٹ میں بتایا گیا کہ بے روزگار شخص (جس کی شناخت ظاہر نہیں کی گئی) کی والدہ کا انتقال 2022 میں ہوا تھا، جس کے بعد سے وہ ان کی ہزاروں یورو کی پینشن دھوکے سے حاصل کرچکا تھا۔
اطالوی پریس نے کیس کو مسز ڈاؤٹ فائر اسکینڈل کا نام دیا جو آنجہانی ہالی وُڈ اداکار رابن ولیمز کی 1993 کی فلم پر رکھا گیا ہے۔
یہ جعل سازی اس وقت بے نقاب ہوئی جب اس شخص نے شمالی اٹلی کے قصبے بورگو ورگیلیو کے رجسٹری آفس میں اپنی والدہ کے شناختی کارڈ کی تجدید کی کوشش کی۔
رپورٹ میں بتایا گیا کہ ایک حکومتی اہلکار نے شک کی بنیاد پر اپنے اعلیٰ عہدیداران کو مطلع کردیا، جنہوں نے بعد میں پولیس سے رابطہ کیا۔
ٹاؤن کے میئر فرانسسکو ایپورٹی نے اخبار کو بتایا کہ ملزم نے ایک لمبا اسکرٹ پہنا ہوا تھا، لپ اسٹک اور نیل پالش لگائی ہوئی تھی اور گلے اور ہاتھوں پر زیورات تھے۔
انہوں نے مزید بتایا کہ ملزم نے خاتون کی آواز نکالنے کی کوشش کی لیکن مختلف مواقع پر مردانہ آواز نکل آئی جب کہ اس کے ہاتھ کی جلد بھی 85 سالہ خاتون کے جیسی نہیں تھی۔