راولپنڈی: بلوچستان میں پاک افغان سرحد کے قریب پاکستان کی سیکیورٹی فورسز نے کامیاب آپریشن کر کے 4 اہم افغان دہشت گردوں کو گرفتار کرکے اسلحہ برآمد کرلیا۔
سیکیورٹی ذرائع کے مطابق 5 مارچ 2025 کو بلوچستان کے علاقے توبہ کاکڑی میں آپریشن کیا گیا۔ جس میں 4 اہم دہشت گرد گرفتار کر لیے گئے۔
ذرائع کا بتانا ہے کہ گرفتار دہشت گردوں سے کلاشنکوفیں، دستی بم اور آتشیں اسلحہ برآمد ہوا۔
سیکیورٹی ذرائع کے مطابق گرفتار دہشت گردوں نے پاکستان میں بڑی دہشت گرد کارروائی کی منصوبہ بندی کا اعتراف بھی کیا ہے۔
گرفتار دہشت گرد نے اعترافی ویڈیو بیان میں بتایا کہ میرا نام اسام الدین اور والد کا نام گلشاد ہے، میں افغانستان سے آیا ہوں اور ہمارا نظریہ ہماری ٹریننگ ہے۔
دہشت گرد اسام الدین نے بتایا کہ میرے پاس 2 بندوقیں، 2 کلاشنکوف، ایک گرینیڈ اور دیگر اسلحہ تھا، ہم افغانستان سے 3 دن پہلے سرحدی باڑ کے راستے رات میں چوری چھپے پاکستان میں داخل ہوئے، ہم نے آگے پشین جانا تھا۔
سیکیورٹی ذرائع کا کہنا ہے کہ گرفتار دہشت گردوں کو مزید تفتیش کیلئے نامعلوم مقام پر منتقل کر دیا گیا ہے، پہلے بھی کئی افغان دہشت گرد سیکیورٹی فورسز کے ہاتھوں جہنم واصل ہو چکے ہیں۔