کراچی: خطے کی کشیدہ صورت حال کے باعث پاکستان سے مشرق وسطیٰ کی آج بھی 155 پروازیں منسوخ کردی گئیں۔
کراچی کی 38، لاہور 32، اسلام آباد کی 36 پروازیں منسوخ کی گئیں۔ پشاور کی 16، سیالکوٹ 13، فیصل آباد 8، ملتان 10، کوئٹہ کی 2 پروازیں منسوخ کی گئیں۔ پاکستان کی 4 دن میں مشرق وسطی کی منسوخ پروازیں 600 سے تجاوزکرگئیں۔
4 دن میں مشرق وسطیٰ کی 16 ہزار سے زائد پروازیں منسوخ ہوئیں۔
فضا کی مسلسل بندش کے باعث ایران کے ایئرپورٹس کی 1000 پروازیں منسوخ کی گئیں۔
مشرق وسطیٰ کے 7 بڑے ایئرپورٹس کی 10 ہزار پروازیں منسوخ ہوچکی ہیں۔ اسرائیل کے تل ابیب ایئرپورٹ سے 4 دن میں 1600 پروازیں منسوخ ہوئیں۔
اردن کی 828، بیروت اور حائفہ ایئرپورٹ کی 500 جب کہ دمشق، النجف، بصرہ اور دیگر ایئرپورٹس کی 875 پروازیں منسوخ ہوئیں۔
آج بھی 8 ملکوں کی فضائی حدود اور فلائٹ آپریشنز بند ہیں۔ دبئی، ابوظبی، شارجہ، دوحہ، کویت، بحرین ایئرپورٹس زیادہ متاثر ہیں۔
ابوظبی، دبئی ایئرپورٹس پر پھنسے مسافروں کو 34 پروازوں سے پہنچایا گیا۔ اعلامیے کے مطابق اتحاد ایئر نے 24 پروازوں کے بعد فلائٹ آپریشن آج دوپہر 2 بجے تک بند کردیا۔
ایمریٹس نے بھی دبئی سے 16 پروازیں روانہ کیں، کچھ کی واپسی ہوئی۔ ایک پرواز میں 160 مسافروں کی اوسط سے 26 لاکھ مسافر متاثر ہوئے۔