واشنگٹن: جدید طبّی سائنس کا حیرت انگیز کارنامہ سامنے آگیا۔ 42 کے بجائے صرف 21 ہفتے کی حملی (gestational ) عمر رکھتے ہوئے قبل ازوقت پیدا ہونے والے نہایت لاغر بچے نیش کو نہ صرف زندہ بچالیا، بلکہ وہ صحت مند رہ کر اب ایک سال کا ہوچکا ہے۔
امریکی ریاست آئیوا کی باسی مولی کا پہلا بچہ بھی جینیاتی خرابی کے سبب قبل ازوقت پیدا ہوکر مرگیا تھا۔ تاہم اگلی مرتبہ ڈاکٹر سر توڑ کوشش کرکے اْسے اولاد کی خوبصورت نعمت دینے میں کامیاب رہے۔
پیدائش کے وقت نیش کا وزن صرف 283 گرام یعنی صابن کی ایک بڑی ٹکیہ کے برابر تھا اور اس کا قد قریباً بالغ انسانی ہاتھ جتنا تھا۔ گنیز ورلڈ ریکارڈز نے نیش کو ’’دنیا میں سب سے قبل ازوقت بچے‘‘ کے طور پر تسلیم کیا ہے۔