علی سیٹھی کی اسکرٹ میں تصاویر وائرل، سوشل میڈیا پر شدید تنقید

لاہور: گلوکار علی سیٹھی ایک بار پھر اپنے لباس اور عجیب فیشن کی وجہ سے خبروں کی زینت بننے کے ساتھ شدید تنقید کی زد میں آگئے ہیں۔
’’پسوڑی‘‘ کے گلوکار علی سیٹھی اپنے آفیشل انسٹاگرام اکاؤنٹ پر نئے گانے “برائیڈ گروم” کی ریلیز سے متعلق تصاویر اور ویڈیوز پوسٹ کرنے کے بعد سوشل میڈیا پر زیرِ بحث ہیں۔
انہوں نے انسٹاگرام پر اس گانے کے ساتھ اپنی چند تصاویر بھی شیئر کی ہیں جن میں وہ پیلے رنگ کی اسکرٹ پہنے اور میک اپ میں دکھائی دے رہے ہیں۔ علی سیٹھی کے نئے گانے میں دلہن کے جذبات کو بیان کیا گیا ہے جو اپنے دولہے کے بارے میں سہیلیوں سے سوال کرتی ہے۔
علی سیٹھی کے اس انداز کو خواتین کے لباس سے متاثر قرار دیا جارہا ہے جس پر سوشل میڈیا صارفین کی جانب سے شدید ردعمل سامنے آیا ہے۔
سوشل میڈیا صارفین نے علی سیٹھی کے فیشن کو عجیب قرار دیتے ہوئے ان کی جنس پر سوالات اُٹھائے اور اس پر بھرپور تبصرے کیے۔ بعض صارفین کا کہنا ہے کہ وہ خود کو کھلے عام کوئیر ظاہر کرتے ہیں اور ہم جنس پرست ہونے کے ساتھ کسی کے ساتھ تعلقات میں بھی ہیں۔
ایک صارف نے کہا یہ سب اس حرام کمائی کا نتیجہ ہے جس پر وہ پلے بڑھے ہیں جب کہ ایک اور صارف نے الزام لگایا کہ وہ خفیہ ایجنڈا پورا کررہے ہیں۔